الفرق بين الهروب من التجنيد والتخلف عن التجنيد 


اولا :-  الشخص المتخلف عن التجنيد هو الشخص اللي مارحش من الأساس للجيش و مقدمش اي أوراق للتجنيد
وقتها حلك الوحيد انك تستني لسن الثلاثون عام و بعدها بيوم واحد تقدر انك تتقدم باوراقك للتجنيد و منها المحكمه العسكريه اللي هتخبطك غرامه من ٣٠٠٠ جنيه الي ١٠٠٠٠ جنيه ...
ايه هي بقي الخطوات اللي هتعملها عشان تخلص موقفك التجنيدي بعد ما تعدي سن التلاتين .

أ : الأوراق_المطلوبة : -
- صحيفة الحالة الجنائية
- البطاقة الشخصية (رقم قومي)
- بطاقة ٦ جند (لإثبات الرقم التجنيدي – الرقم الثلاثي)
- و خلي معاك شهادة الميلاد وشهادة التخرج احتمال يطلبوها منك و ده نادرا

ب : الاجراءات : -
- حاول تروح منطقة التجنيد بدري عشان يومك يوم مش سهل و تلحق تخلص
- اول ما توصل تسأل عن المكان اللي بينهي معاملات تخلف التجنيد
- اشتري دوسيه تخلف تجنيد هتلاقي جوه الدوسيه ورقة صفراء (نموذج ٦ جند معدل) وورقتين لنموذج التحقيق وإيصال استلام مستندات
- وبعد كده تروح الشباك تقدم الطلب
- هتاخد منهم إيصال الاستلام بعد الختم ويقولك تعالي بعد أسبوع
خلال الأسبوع ده هيتحروا عنك إذا كنت قد قمت بالكشف الطبي قبل كده أو لديك تأجيل لأي سبب
- بعد الاسبوع هتروح إلى منطقة التجنيد و تروح لنفس الشباك وتديلوا الإيصال الذي أخذته منه الأسبوع اللي قبله هيطلب منك صحيفة الحالة الجنائية وصورتين منها وصورتين البطاقه الشخصيه و تاخد ورقة التحريات و تحطها في الدوسيه
- هتروح بعد كده إلى مكتب الأمن لختم ورقة التحريات
- وبعدها هتطلع علي مكتب التحقيقات وذلك للتحقيق معاك حول تخلفك عن التجنيد (مجرد إجراء روتيني)
- وفي مكتب التحقيقات هياخد منك الدوسيه ويطلع على بطاقتك الشخصية للتأكد و هيسالك كام سؤال عن سبب انك ماروحتش التجنيد(في اغلب الحالات يقوم هو بملء الإجابات من غير ما يسالك )
- بعد كده هيديلك إعلان للذهاب إلي المحكمة العسكرية بعد أسبوع أيضا ، وهذا الإعلان خاص بموعد لتحديد الجلسة الخاصة بك
- بعد مرور الأسبوع هتروح إلى المحكمة و تتوجه مباشرة إلى مكتب النيابة العسكرية و هياخدوا منك البطاقة الشخصية والإعلان للجلسة و هتستني شويه و بصراحه هتستني شويتين تلاته
- بعد كده هينادوا علي الأسماء و هتدفع مبلغ ۳ جنيهات وتأخذ البطاقة والإعلان اللي مكتوب فيه تاريخ و ميعاد الجلسه .
-يوم الجلسه تروح بدري و هيتنادي الأسماء و هيتاخد حضور و غياب و الجلسه هتشتغل هتلاقي القاضي بيسالك عن سبب تخلفك عن التجنيد نصيحه حاول متحورش عليه و قول الحقيقه عشان عدي عليه كتير
- بعد مثول الجميع أمام القاضي ، هيقوم القاضي بقراءة الأسماء والحكم بقيمة الغرامة
- هتلاقي فرد من الشرطة العسكرية بينادي لأسماء ثاني و يشوف مين معاه الغرامه (حاول إن تأخذ مبلغ الغرامه معاك)
- يقوم كل من يريد الدفع بالتوجه إلى الخزينة مع فرد الشرطة العسكرية ، حيث يقوم المسؤل بأخذ المبلغ وإعطائك إيصال رسمي بالقيمة المدفوعة
- بعد الدفع هتاخد ميعاد تاني عشان تاخد صورة من الحكم و ترجع بيها إلى منطقة التجنيد لاستخراج الشهادة

ثانيا : الشخص اللي يعتبر هارب من التجنيد يعني واحد دخل الجيش ومثلا نزل اجازه وما رجعش و ده قصه تانيه خالص

ده لو اتمسك من الشرطه العسكريه هيقضي جيشه و هيتحكم عليه بتهمة الهروب و هيتحبس في السجن الحربي
ولو اتمسك من الشرطه العاديه هيترحل للشرطه العسكريه ونفس القصه برضوا
طيب لو فضل هربان ومتمسكش وعدي الثلاثين سنه يقدر يدفع الغرامه زي المتخلف عن الجيش ؟؟؟
الاجابه ...
لا طبعا لازم يعدي سن ۳٦عام ويتقدم لمحاكمه عسكريه و هيتحكم عليه بالغرامه .
واخيرآ نصيحه محدش يستهون بالموضوع لأن طول الفترة ديه بيكون المتخلف او الهربان من التجنيد مستقبله واقف تمامآ اي شغل اي سفر للخارج و السفر لبعض المحافظات في مصر كل دول محتاجين شهادة الجيش يعني فرص بتضيع علشان مش قادر تستحمل سنة او اثنين او ثلاثه حسب فترة تجنيدك فتضيع باقي العمر .

كتابة تعليق :

أحدث أقدم